News, Articles & Tips

काठमाडौँ उपत्यकामा संरचना निर्माण गर्दा अब २०६५ सालमा मन्त्रिपरिषद्ले निर्धारण गरेको मापदण्ड नै लागू हुने भएको छ ।

Posted on May 22, 2026

काठमाडौँ उपत्यकामा संरचना निर्माण गर्दा अब २०६५ सालमा मन्त्रिपरिषद्ले निर्धारण गरेको मापदण्ड नै लागू हुने भएको छ। सर्वोच्च अदालतको पूर्ण इजलासले यसअघिको आदेश सच्याउँदै सो मापदण्ड कार्यान्वयन गर्नुपर्ने फैसला गरेको हो ।

यसअघि संयुक्त इजलासले नदी–खोला किनारमा २० मिटर थप छाडेर मात्रै संरचना बनाउनुपर्ने आदेश दिएको थियो। तर पुनरावलोकनपछि पूर्ण इजलासले उक्त निर्णय उल्टाउँदै २०६५ मंसिर १ गतेको सरकारी मापदण्ड नै कायम हुने ठहर गरेको हो ।

फैसलाअनुसार काठमाडौँ उपत्यकामा बग्ने विभिन्न खोलाहरूका किनारमा तोकिएको दूरी छाडेर मात्र संरचना निर्माण गर्न पाइनेछ। त्यसअनुसार वाग्मती, विष्णुमती र मनहरा खोलामा २० मिटर, धोबीखोलामा आयोजना क्षेत्र बाहेक ९ मिटर, नख्खु खोलामा १२ मिटर, बल्खु, कर्मनासा, कोइङ्क, साले र महादेव खोलामा १० मिटर तथा टुकुचा, सामाखुसीलगायत अन्य खोलामा ४ मिटर छाड्नुपर्ने व्यवस्था लागू हुनेछ ।

साथै कुनै पनि खोलाखोल्सी वा राजकुलो छोप्न नपाइने र हनुमन्ते खोलाको किनारमा पनि २० मिटर दूरी कायम गर्नुपर्ने आदेशमा उल्लेख छ ।

यसअघि संयुक्त इजलासले २०६५ सालको मापदण्डभन्दा थप २० मिटर दूरी कायम गर्नुपर्ने आदेश दिएको थियो, साथै उक्त सीमा भित्र बनेका संरचना हटाउन र अधिग्रहण गर्नसमेत निर्देशन दिएको थियो ।

तर पछिल्लो पूर्ण इजलासको फैसलाले सो व्यवस्था संशोधन गर्दै सरकारी मापदण्डअनुसार नै कार्यान्वयन गर्नुपर्ने स्पष्ट गरेको छ ।

news source: rajkumar kc, janata news
published on: may 21, 2026